पुणे जिल्ह्यातील ग्रामीण भागात 30 एप्रिल पर्यंत अत्यावश्यक सेवा वगळता इतर अस्थापना पुर्णतः बंद

पुणे महानगरपालिका आयुक्तांनी काल संध्याकाळपर्यंत ब्रेक द चेन हा आदेश दिला होता, परंतु जिल्हाधिकारी डॉक्टर राजेश देशमुख यांनी मात्र रात्री उशिरापर्यंत हा आदेश जारी केला नव्हता, त्यामुळे जिल्ह्यात संभ्रम होता. परंतु रात्री उशिरा जिल्हाधिकारी यांनी जाहीर केलेल्या आदेशानुसार पुणे जिल्ह्यातील ग्रामीण भाग, ग्रामपंचायती, नगरपालिका, नगरपरिषदा, नगरपंचायती व छावणी परिषदेच्या हद्दीत लॉकडाउनची मुदत 30  एप्रिल 2021 रोजी रात्री बारा वाजे पर्यंत वाढविण्याचा आदेश दिला आहे.

       त्यानुसार प्रतिबंधित व बंद क्षेत्र व सूट आणि वगळण्यात आलेली क्षेत्रे यामध्ये कायम ठेवण्यात आलेली आहेत. यामध्ये राज्य सरकारने यापूर्वी ज्या सूचना दिलेल्या आहेत, त्या सूचनांचा अंमल पुणे जिल्ह्यातही लागू राहणार आहे. त्यामुळे पुणे शहराप्रमाणेच अत्यावश्यक सेवा वगळता इतर आस्थापना बंद राहणार असून सरकारने सुधारित केलेल्या आदेशानुसार काही नव्याने समाविष्ट केलेल्या आवश्यक सेवा वगळता इतर सेवा व आस्थापना बंद राहणार आहेत. या आस्थापना 30 एप्रिल पर्यंत बंद राहणार आहेत.

      आणखी आवश्यक सेवांचा समावेश – काल ४ एप्रिल रोजी ब्रेक दि चेनच्या आदेशात ज्या आवश्यक सेवांचा उल्लेख होता, त्यात आणखी काही सेवांचा समावेश आज राज्य सरकारने केला आहे. त्या संदर्भातील आदेश आज प्रसिद्ध करण्यात आले. आता खालील सेवा देखील आवश्यक सेवामध्ये येतील.

    पेट्रोल पंप, आणि पेट्रोलियम संबंधित उत्पादने, २. सर्व प्रकारच्या कार्गो सेवा, ३. डेटा सेंटर, क्लाऊड सर्व्हिस प्रोव्हायडर्स, आयटी – माहिती तंत्रज्ञान सबंधित महत्वाच्या पायाभूत सुविधा आणि सेवा. ४. शासकीय व खासगी सुरक्षा सेवा. फळ विक्रेते.

      खालील खासगी आस्थापना व कार्यालये सकाळी ७ ते रात्रो ८ या कालावधीत सुरु ठेवण्यास परवानगी दिली आहे. मात्र केंद्र शासनाच्या निर्देशानुसार त्यात काम करणाऱ्या कर्मचाऱ्यांचे लसीकरण करावे लागेल. जोपर्यंत होत नाही तोपर्यंत दर १५ दिवसांचे कोरोना निगेटिव्ह आरटीपीसीआर प्रमाणपत्र बाळगावे लागेल. 10 एप्रिलपासून याची अंमलबजावणी केली जाईल आणि नियम मोडणाऱ्या व्यक्तीकडून १ हजार रुपये दंड घेण्यात येईल.

ह्या खासगी आस्थापना व कार्यालये पुढीलप्रमाणे आहेत:

सेबी तसेच सेबी मान्यताप्राप्त संस्था जसे की स्टॉक मार्केट, डिपॉझिट आणि क्लिअरिंग कॉर्पोरेशन्स. रिझर्व्ह बँकेच्या नियंत्रणाखालील संस्था, प्राथमिक डीलर्स, सीसीआयएल, एनपीसीआय, पेमेंट सिस्टीम ऑपरेटर्स, सर्व नॉन बँकिंग वित्तीय महामंडळे, सर्व मायक्रो फायनान्स संस्था. सर्व वकिलांची कार्यालये. कस्टम हाऊस एजंट्स, परवानाधारक मल्टी मोडल ट्रान्सपोर्ट ऑपरेटर ( लस/ औषधी / जीवनरक्षक औषधांशी संबंधित वाहतूक)

     ज्या व्यक्ती रात्री ८ ते सकाळी ७ या वेळेत रेल्वे, बसेस, विमाने यातून आगमन किंवा प्रस्थान करणार असेल त्याला अधिकृत तिकिट बाळगावे लागेल जेणे करून तो संचारबंदीच्या कालावधीत स्थानकांपर्यंत किंवा घरी प्रवास करू शकेल.

      औद्योगिक कामगारांना त्यांच्या ओळखपत्राच्या आधारे रात्री ८ तर सकाळी ७ या वेळेत कामाच्या पाळ्यानुसार ये जा करता येईल.

     एखाद्या धार्मिक स्थळी विवाह किंवा अंत्यसंस्कार असेल तर शासनाने ४ एप्रिल रोजी दिलेल्या आदेशातील नियमांचे पालन करून परवानगी देता येऊ शकेल. परीक्षा देणाऱ्या विद्यार्थ्यास रात्री ८ नंतर घरी प्रवास करावयाचा असेल तर हॉल तिकीट बाळगावे लागेल.

      आठवड्याच्या शेवटी म्हणजे शनिवार आणि रविवारी विवाह समारंभ असेल तर स्थानिक प्रशासन त्यासंदर्भात परिस्थिती पाहून आणि नियमांचे पालन करण्याच्या अटींवर परवानगी देईल. घरगुती काम करणारे कामगार, वाहनचालक, स्वयंपाकी यांच्या रात्री ८ नंतर ये जा करण्याच्या बाबतीत स्थानिक आपत्ती व्यवस्थापन प्राधिकरण परिस्थितीनुरूप निर्णय घेईल.